哇哈哈哈，死懶鬼終於肯動手了...
台北四日三夜之旅啟程，大家really好未？
Day 1 2008-05-23
比平時更早既七點十五分起身，刷牙洗面再睇下我既行裝，OK出發！落到樓下有隻肥o都o都已經等左好耐喇，哈哈～快d去機場啦～九點鐘到機場，食少少野，等埋李大小姐十點入閘！
幫Sally哥買左四條Mild Seven，日本特別版啊～
終於十點半算準時地起飛～飛呀飛～十二點準時到達～哇哈哈，台北桃園機場，我愛你呀～
坐國光號去台北火車站，一落車就落狗屎... 成對鞋濕到透，哩個係一個慘痛既經歷（慘在之後兩日）。
終於返到西門町既君帥酒店，坐底野我地就去食下野坐下台北自豪既MRT喇！
係西門町食完間好多蛋既蛋蛋屋之後就坐捷運出去忠孝東路走九遍了～
原來我搵返哩既Partner同我行街風格有d唔同，哈哈！我既風格係，盡量入哂咁多間，間間都要睇下有咩特別野... 而李大小姐一對既風格居然係揀岩就入，入得就要睇到透=_=||| 咁我想問你睇得幾多間？哈哈...
Anyway，佢有男朋友捨身相陪，我亦揪住我隻肥o都o都係佢睇緊同一間鋪頭既時候行多左幾條街，唔錯～跟住係佢地買超果間同樹頭婆吹水，原來我個planning真係幾好，哈哈！
跟住去左傳說中24小時既敦南誠品，睇左一段時間書之後再戰誠品旗艦店，終於幫買到我既Stayreal衫衫（x2）喇！亦都同bb買左件情侶裝，哇哈哈！
係誠品戰鬥左咁耐，最後居然都係無買書！唔緊要啦，Sally哥話：「你這次全都買齊了你下次來幹嘛啊？」有豆奶... 於是我地繼續向就係眼前既台北最高點101進發！
好彩既係，我地由蛋蛋屋食完野出來到哩一刻都未無再落雨，但係我地入101既一刻，可惡既雨又出現喇... 不過都無阻我地入101既決心，終於我地用左好似10秒坐佢架全世界最高速既電梯去到到89樓！睇哂全成台北市，真係好靚呀！400蚊台幣一位係值得比架！開始發覺台灣人好鍾意公仔架，101上面有幾隻圓碌碌公仔好得意呀！本來由於大雨既關係原來停左既91樓露天樓層專登停左陣雨比我地上去望一望之後又開始落雨喇，跟住再落一落去88樓睇下個十倍龜波氣功就走喇～
雖然好唔捨得哩個咁靚又咁壯觀既夜境，不過我地實在太肚餓喇，所以下一站饒河街夜市掃街之旅！好野，無雨喇又，食食食左大半條街，Sally哥話夜d帶我地去食火鍋，我地當然就住哩食啦！
夜市行完，再轉戰五分埔買衫衫衫！點解隻bb成日都睇唔岩衫仔既，哇哈哈！我就唔客氣喇，不過都唔係好多姐，2x衫衫+1x褲仔咋嘛！
兩隊唔同風格既隊伍分散攻擊約1個鐘之後坐捷運尾班車返酒店～（可憐既人有人買左4件有3件唔岩著，好陰公哈...）係捷運站，有人話：「咦，原來24號喇喎... 」
終於我地返完酒店再join返係樓下等左我地好耐既Sally，時間已經係午夜1點鐘喇...
係咪唔覺唔覺呢？吹水食野，食到連我都圓左喇，食得哩都成3點幾，再返酒店拎返幾條煙，吹下水，4點返再上返去，我估我5點前應該訓左喇...
好有衝勁既Day1至此終於完畢～
Day 2 2008-05-24
哩一日係Miss Lee生日，生日快樂！
晨咁早，十點我地就出發喇，哈哈！十點都叫晨咁早，不過真係好眼訓呀，迷暈咁坐MRT去到木珊轉坐當地巴士，我地一行四人好地道咁樣去到左深坑豆腐街！哇哈哈～
一路行我地一路忍口唔食住，因為我地決定行完第一轉之後，返轉頭先食！行到最後，受唔住哥哥仔強勁既行銷技巧，買左好多支傳說中的「蔓莓汁」，不過真係好好飲呀！買完哥哥仔話「感應到」十分鐘後要落雨，叫我地快手搵地方食野，最後我地入左最出名既「陳家豆腐」入面，出面真係落雨=_=|||食完一餐好美味既豆腐餐之後，雨停出發，哈哈！好開心個天咁合作！然後我地終於生完豆腐街，係Miss Lee未行完之際我同我隻bb買左個cake仔出人家，算係慶祝左架喇，哈哈！食完cake仔我地就坐返巴巴返MRT站，轉戰貓空！
去到貓空，都居然成三點幾喇，真係hea左好耐呀，排左唔係好耐，大約十五分鐘就上左吊車，真係好正呀！全長應該同我地香港既360差唔多不過人地先50蚊台幣，我地要百幾蚊港紙！上到去，我地坐遊園巴巴係山上兜左個圈先，睇下風景先丫嘛！點知落車果陣原來得本人係清醒，shit！跟住我地就搵左個又睇到指南宮又睇到101既地方坐底泡茶吹水喇！真係享受呀，坐係山上面，燒住水沖住茶吹風，仲要落完雨空氣特別好！爽呀！
由太陽仲係度，我地坐到太陽落左山八點左右先閃人，閃人都係因為好多飛飛係度，兩位女士驚咋，哈哈！坐返吊車落去再轉MRT返西門町，之後我地就自由活動時間喇～我同我隻bb行左西門町兩間誠品，成功買到野，再戰graphics再多件比bb同母親大人，係已經餓到肚扁既時候，我地亦都清袋了T_T！
哩個時候救星出現喇，Sally主動浦頭救左我地！帶我地去龍山寺萬華夜市行街食野，仲借多四千蚊台幣比我地使住先，哇哈哈！太好人喇實在！跟住食完行完我地仲行路返酒店添，哈哈！真係好多謝你呢～～～
返到酒店，訓覺前對錶：兩點幾囉... Day 3 2008-05-25
哩一日係我最準時無賴床起身既一日，因為根據行程我地要趕上10:20分係台北車站開往瑞芳既台鐵，結果雖然準時起身，但係有點小意外都係趕唔到T_T 而下一班列車係中午12:00！
OK fine！仲有時間，我地都係自由活動，我同隻b去台灣故事館兜個圈先！無比入場費入去，跟住係外邊行左陣，都幾得意，呵呵！可惜我地時間唔多，下次去既話先再入去啦！呵呵，行左陣返去會合，坐台鐵往瑞芳，落車轉平溪線小火車，撞到一對係外國返來既台灣仔女，國語都唔識講佢地仲勇過我，哈哈！傾左陣計幾老友，不過佢地去九份，我地去平溪，有緣再見啦～
唔使五分鐘小火車就開出，我既planning都唔錯掛，哈哈！直接到去尾站菁桐，點知一落車... 落雨...
咁唯有一切從簡啦，先做最重要既野，寫平溪既木板明信片返屋企，哈哈！再加一張返公司，bb都係一樣，跟住再寫許願竹竹，然後買返d手信先，再來... 畫天燈！呵呵，不過畫左佢一路都唔肯停雨，咁我地又就餓死，就叫冰棒阿婆帶我地去食野啦，帶左我地去一間食紅燒牛肉麵既鋪頭，係喎！台灣既紅燒牛肉麵出名架喎，差d唔記得食添！食左個麵，加兩條菜，仲有其他小食，食完返出去，bb隻腳指尾出現意外...
意外之後，雨居然停左陣，我即刻閃出去放天燈，哇哈哈～～好高呀！高到唔知去左邊，都唔知佢跌左去邊喇！哇哈哈～開心哂～
不過Miss Lee就無咁好彩=_=...
不過總算了左件心事啦，買左一人一支梅花冰棒趕火車，跟住就直往我地下一站：十分站喇！
去到十分站，都係無雨丫，幾好丫～我地慢慢行去十分大瀑布，其間真係山明水秀，呵呵！真係好有鄉間既風味，我好鍾意好鍾意呀！終於好漫長既路我地終於去到瀑布，可惡既係要收入場費，位位一百，我地都唔執輸影返好多相相，哈哈！
跟住可怕既事來了，我地行返大華站，因為人人地話十分大瀑布其實係近大華多過十分，我地又唔想行回頭路，咪行向大華方向囉！點知原來全程都係無行人路架，我地只有行住火車路咁返去...而其間最得人驚既，莫過於應該係果條全黑既隧道喇... 講起都驚驚！
不過總算有驚無險，半行半跑之下係我地仲行到既情況下去到大華站，等左唔夠五分鐘就上返回程小火車返瑞芳...（即係話如果唔係半跑，我地可能返唔到去... 哈哈！）
終於八點幾先返到台北車站，拎返行李之後我地又分頭行事，Miss Lee同佢隻男先去士林，我就當然要趕住返今晚我地既屋企，春天溫泉酒店既露天溫泉關門前浸返一頭半個鐘先啦！返到房係咁易過下水就即落去浸，浸到有d腳仔軟添！係關門前最後五分鐘左右，Miss Lee趕返來叫浸左野，哈哈！跟住返到房沖完涼，十點半左右，我同我隻b已經係餓到唔識出聲，叫前台call的士，我地決定出去士林博下仲有無野食，呵呵！
點知仲比我食到最後第十塊既豪大大雞排，跟住再食左哩樣果樣既小食，飲左大大杯珍珠奶茶，台灣既珍珠奶茶真係特別好像架喎！
跟住原來隔離果兩條街好多野行好多野玩架，我玩槍槍第一次玩十槍就中左七，呵呵！得到「樓計色」一粒～行呀行、行呀行，最後點幾班師回朝！沖完涼，full埋個膜訓覺前對錶：又係兩點幾... Day 4 2008-05-26
終於到左要返屋企既一日，一起身就有好唔捨得既感覺！今日總算訓到最晏，十點先起身，又係大雨天！出發起程去淡水會合Sally哥～
大約十一點半見面之後來個抱抱，佢就帶我地去淡水老街同淡水河邊行下，之後坐船過去對面八里食飯，佢話哩度食野最特別既果尾野叫孔雀蛤，我當然係唔食啦！個樣好似無開邊既青口咁，核突～不過我就食左好多菜，台灣既菜唔知點解又係特別好食架！
食完之後返去淡水老街行，買左燕窩比老母大人做手信，又買左幾包鐵蛋，換左萬幾蚊台幣用哩買手信同還水比Sally哥，買完出發去西門町老天綠買鴨舌，然後去天仁茗茶最後回味多杯最出名既珍珠奶茶同埋買左好多茶葉，呵呵！
然後行路前往台北車站，原本想去埋義美買蜂蜜蛋糕，點知台北車站附近果間執左T_T 如果要去第二間買又唔夠時間... 哩個時候Sally哥出聲喇：「你這次全都買光光你下次要來幹嘛啊？留下次買就好了！」你又有道理喎... 然後佢最後就送左我地去坐國光號去機場喇，走之前大家再來一個抱抱，真係眼水都就哩流出哩喇！好多謝佢哩幾日陪左我地咁多，帶我地去完仲請我地食好好食既火鍋呢！下次來香港我地一定要請返你架！
其時是晚上七點幾，去到機場已經係八點幾喇！去到機場我同肥b首先去買左幾支提子味益力多（原本要買綠茶味但係無貨呀，屎露比既手信囉！）仲有買左好多鳳梨so，之後拎件行李去check-in，再去免稅店hea左好耐就上機返香港喇... 真係好唔捨得哩四日，無憂無慮既日子！不過唔緊要啦，我會再來的！台灣！ 其實有少少感想，去完成個行程返來我估有人會對我有D意見...
但係anyway，我覺得如果你無打算過去訂立你既行程，請唔好期望人地個行程會係為你度身訂制。
我一定會以我主觀角度行先，即係等如跟團咁一團人之中一定會有人有地方唔滿意。
不過做帶隊果個最可憐既係，Plan得好唔會有人多謝你，唔合人心意就會有說話聽。
咁大個人，有時應該更企係人地立場去諗，特別係男人個腦既運作唔係只從女人出發。
仲有，你未比小費～XD | 
